我好中意思扯扯。
中意佢嘅人,好多都係先中意《我和春天有个约会》,中意前奏嗰段简直好似冻柠蜜咁嘅昔士风。
但我係先中意《如果你知我苦衷》嘅。
因为我觉得,有咩嘢,重要得过,肯企喺人哋嘅角度去睇嘢霖嘢? 所以,我闹人之前,总会先睇吓,佢係咪唱紧《如果你知我苦衷》先。
大家中意同我倾感情问题,其实原因都一样。因为佢哋觉得我会FEEL到佢哋嘅苦衷。
“佢点解要咁对我?我已经为佢改变好多啦。”
“我真係想分手嘅,点会有女人会痴缠得咁厉害嘎!”
“我唔明喔~明明我爱佢,佢又爱我,我哋点解唔可以一齐嗟。” 好多苦衷。
然后我就会,同佢哋讲吓,可能对方都有苦衷呢。
我哋都唔係伟大嘅人,但必要时,我哋可以攞个宽容嘅心出嚟。 因为我始终相信,无论凡事总会有“因”。既然唔了解个“因”,倒不如放过呢个“果”,过去咗就当过去咗。
“你改变咗好多,但係咪变嘅都係佢所希望嘅?或者你嘅改变根本就係斩脚趾避沙虫?”
“你问佢点解痴缠你,你点解又唔霖吓自己点介解想分手?”
“你爱佢佢爱你,但爱係咪你哋之间唯一嘅嘢先?”
呢啲“因”,其实都係苦衷。
朋友突然同我讲,佢怀疑佢阿妈有外遇。佢问我,“我好唔好喺佢部车度放个录音笔或者摄录机?”
我就以为佢原来出国,係咪打算读“特工”呢个专业?
“伯有”係个女强人,同老公一齐打江山。江山打咗落嚟,虽然细屋搬大屋,但见客多过见屋企人。反而老公成就咗霸业之后,就开始得道成仙,跑吓步养吓狗。
朋友就係呢个时候开始发现,“伯有”开始有外遇。
问题进展到今日,“伯有”唔单止有外遇,仲係第三春。正准备飞咗原来嗰个,同第四者一齐,每晚仲玩QQ-CAM玩得不亦乐乎。 我问朋友,咁你想抓住佢痛脚又点?
“帮老豆做啲嘢咯。唔使将来离婚时,我老豆咩都无晒。”
“例如?”
“层楼,部车,全部係佢哋一齐买嘅,但就落咗阿妈个名。”
“既然係你老豆买,咁佢唔止只有呢啲嘢啩?”
“咁係,仲有间厂。”
“佢既然写得你妈个名,其实就预咗无论如何,呢啲嘢佢都唔会带走嘎啦。”
“但我妈点可以咁啊……虽然佢係双鱼座……”
“或者佢有苦衷呢。”
讲到最后,朋友当然唔会咁轻易相信“伯有”有咩苦衷。我霖到好多“或者”,但最后都係无讲出嚟。
朋友义愤填膺,打算抓阿妈痛脚,主要係想帮老豆出口气,不过就无霖过,到嗰一刻,已经唔会只係出口气咁简单的结局。
佢更无霖过,或者佢老豆其实已经知道;或者佢老豆已经“唔得”但佢阿妈仲想要;或者当初阿妈嫁俾老豆本身就係家庭压力;或者老豆以前做过对唔住阿妈嘅嘢,而家阿妈做翻转头;或者老豆爱之极深极沉,信咗教,信咗爱一个人唔係占据而係望佢快乐;或者……或者老豆只係单纯地相信,阿妈有苦衷。
如果布殊相信拉登有苦衷……
如果禽流感啲鸡有苦衷……
如果大家相信米高积逊有苦衷……
如果傻丫唔係望扯扯快乐咁简单的苦衷…… |